Авиация генерал-майоры Талғат Жақыпбекұлы Бигелдинов — Екі мәрте Кеңес Одағының Батыры атағын алған тұңғыш қазақ. Ұлы Отан соғысының аты аңызға айналған ұшқышы, «шабуылдаушы авиацияның королі» атанған тұлға. 1945 жылы 24 маусымдағы Жеңіс шеруіне қатысқан.
Авиацияға жол
Талғат Бигелдинов бала кезінен ұшқыш болуды армандады. 1938 жылы, 16 жасында, Фрунзе (қазіргі Бішкек) қаласының аэроклубына түсті. 1940 жылы Қызыл Армияға шақырылып, Балашов әскери авиация ұшқыштар мектебіне, кейін Оренбордың Чкалов атындағы әскери авиация училищесіне ауыстырылды.
«Шабуылдаушы авиацияның королі»
Соғыс Талғат Бигелдинов үшін 1943 жылдың ақпанында басталды. Оған «13» нөмірлі Ил-2 штурмовигі берілді. Соғыс жылдарында штурмовик ұшқышы орта есеппен небәрі 11 рет ұрысқа ұшатын. Талғат Бигелдинов 305 рет ұрыс тапсырмасына ұшып шықты — әрқайсысы соңғысы болуы мүмкін еді.
Құрмет
Батырдың есімі Әскери колледжге тегін берілген жоқ: оның өмірі мен ерлігі болашақ Отан қорғаушыларына үлгі болып табылады.